عملنا مقالة جديدة عن أكتر الموضوعات طلبا من قبل مشتركينا ومتابعينا وهى طريقة التقديم لامتحانات المعادلة الامريكية USMLE ، أو How To apply for ECFMG ، والمقالة دى هيكون فيها شرح بالتفصيل لكل الخطوات حتى حجز الامتحان ان شاء الله.

أهم الادوات الى هتحتاجها عشان تقدر تسجل على ecfmg 

الباسبور : لأننا هنحتاج منه الاسم وبيكون First name & last name ، وهنوضحلكوا ازاى تكتبوا الاسم صح فى باقى المقال.

وسيلة للدفع : فيزا أو ماستر كارد.

لو خريج : صورة من شهادة التخرج ( شهادة الكارتون ) مع ترجمتها للغة الانجلية لو مش مترجمة ، وهتحتاج بيان درجات او Transcript، والخطوتين دول للخريجين فقط ، اما لو طالب أو امتياز مش هتحتاجهم دلوقتى.

أهم الخطوات عشان تقدر تبدأ فى امتحانات ال USMLE ؟

• أولاً : ECFMG ID وهو رقم تعريفى خاص بكل طبيب ويتم إصداره مرة واحدة فقط لكل طبيب ببياناته .
• ثانياً : ECFMG Certification وهيكون من خلال خطوتين : الأولى خطوة تقديم أونلاين ، والتانية هى النوتارى كام Notary Cam
• ثالثاً : USMLE Exam Application وهى خطوة التقديم على الامتحانات.
• رابعاً : Medical school verification  وهى خطوة اساسية للحصول على ال   Certification فقط وليست أساسية لدخول الامتحان.

هنتكلم عن كل خطوة بالتفصيل فى هذه المقالة ان شاء الله.

أولاً : كيفية الحصول على ECFMG ID

عشان يكون ليك حساب خاص بيك وتعمل Login على موقع ال ECFMG لازم يكون عندك ال ECFMG ID وأيضا الباسورد .

هنبدأ بالخطوات للحصول على ال ECFMG ID ، من خلال الموقع الرسمى من اللينك دا ، نختار من القائمة الموجودة بالاعلى On-line services ، ثم نقوم باختيار IWA –  Interactive Web Applications ، كما فى الصورة التالية

بعدها سيتم فتح صفحة جديدة ونختار منها الاختيار التالت زى الصورة دى

بعدها هيظهرلك بعض الشروط والتعليمات ويجب الموافقة عليها للوصول للصفحة التالية ، ستقوم بعمل علامة صح على الموافقة على الشروط ، و بعدها سيقوم بتوجيهك للصفحة التالية وفيها سؤال وهو هل قمت بالتسجيل قبل ذلك على موقع ال ECFMG قبل ذلك وبالتأكيد ستقوم باختيار لا ، ثم الخطوة الأخيرة وهى اضافة بياناتك الشخصية وبيانات الكلية و ايميلك الشخصى .

ومن أهم خطوات التسجيل هو الاسم ، اذا فرضنا ان الاسم بالكامل هو 

Mohamed Ebrahim Elhusseiny 

فستقوم بكتابته كما فى الصورة ، فهى خطوة مهمة ، الاسم الأخير من اسمك هو فقط ما ستقوم باضافته فى مكان ال Last name أما باقى اسمك ستقوم باضافته فى ال First Name

بعد كدا هيوصلك ايميل خلال اسبوع تقريبا وموضح فيه الرقم التعريفي بتاعك أو ECFMG ID الخاص بيك.

كدا خلصنا الخطوة الأولى وبقى معانا ال ECFMG ID لكن لسه محتاجين الباسورد .

 وللحصول على الباسورد هنعمل الخطوات دى ، هنرجع مرة تانية للموقع الرسمى ، ومرة تانية هنختار من القائمة الموجودة بالاعلى On-line services ، ثم نقوم باختيار IWA –  Interactive Web Applications ، لكن الفرق المرة دى اننا هنختار الاختيار الرابع أو الاخير زى الصورة دى

وبعدها هيطلب منك نفس البيانات الى ضفتها قبل كدا فى الخطوة السابقة وهى بياناتك الشخصية والايميل وبيانات كليتك ، هتضيف نفس البيانات دى مرة تانية وبعد ما تخلص هيكون معانا الباسورد .

وبكدا بقى معانا ال ID والباسورد ونقدر نعمل بيهم Login ودى نهاية أول خطوة.

في حاله تاخر وصول ال ECFMG ID من خلال الايميل او في حالة الاحتياج الي التواصل مع ال ECFMG في اي وقت يمكنك التواصل معهم من خلال اكتر من طريقه ولكن يفضل التواصل من خلال مكالمه تليفونية (باستخدام رصيد فيبر علي سبيل المثال) من خلال الارقام وفي المواعيد التالية لسرعه الرد والاستجابة مقارنة بالتواصل من خلال الايميل الي ممكن يستغرق الرد عليه أسبوع او أكثر.

ثانياً : ECFMG Certification

زى ما وضحنا قبل كدا هيكون فى خطوتين ، الاولى هى التقديم أونلاين ، والتانية هى النوترى كام

هنبدأ بالخطوة الأولى وهى التقديم أونلاين : بعد ما حصلنا على ال ECFMG ID والباسورد ، هنعمل Login ببياناتنا .

بعد ما تعمل Login هتلاقى على اليسار لينك للتقديم على ال Certification هتضغط على كلمة Apply زى الصورة دى.

 بعدها هيطلب منك بعض البيانات وهى مشابهة تماما للبيانات الى وضحناها قبل كدا زى البيانات الشخصية وهكذا ، لكن فى الخطوة دى هيزيد Medical Education Status وهتوضح فيها ان كنت طالب أو خريج وبردة هيزيد خطوة دفع الرسوم ، فلازم يكون معاك الفيزا أو الماستر كارد جاهزة وفيها المبلغ المطلوب هو 135$ .

بعد اتمام الدفع بنجاح ، هيظهرلك Form عشان تحملها وهى Certification of Identification Form – Form 186 ، وهتحمل الفورم دى عندك على جهازك عشان دى الى بنستخدمها فى الخطوة الى بعد كدا ، وبكدا نكون خلصنا خطوة التقديم أونلاين .

نيجى بقى لخطوة النوتارى كام – Notary Cam

هتدخل على موقع النوتارى كام من اللينك دا ، وتختار Form 186 زى الصورة دى

بعدها هيطلب منك بيانات شخصية زى قبل كدا ، هتضيف البيانات زى الصورة دى

بعدا ما تخلص الخطوة دى ، هيطلب منك الفورم Form 186 الى حملناها فى الخطوة الى قبل كدا ، وكمان هيطلب منك صورة الباسبور بتاعك موضح فيها بياناتك الشخصية ، بعد ما تبعتلهم البيانات دى ، هيبعتولك ايميل عشان تحدد موعد المقابلة .

وقت المقابلة المفروض تكون مجهز كمبيوتر وفيه كاميرا شغالة لان هياخد ليك صورة ، وكمان هيطلب منك تكون ماسك الباسبور فى ايدك .

بعد اتمام المقابلة دى بنجاح ان شاء الله ، فى خلال 10 أيام عمل تقريبا هيوصلك ايميل من ال ECFMG ان تم تأكيد اوراقك بنجاح .

وبنهاية الخطوة دى نكون وصلنا لنهاية الخطوة التانية .

ثالثاً :USMLE Exam Application

هتعمل Login لحسابك فى ECMG هتلاقى على اليسار جدول مكتوب فيه Application for USMLE Examination وتحتها مكتوب Apply  هتضغط على كلمة Apply زى الصورة دى.

هيظهرلك صفحة فيها بعض البيانات المطلوبة أهما هتمتحن ستب 1 ولا ستب 2 ، و أيضا ال Eligibility period وهى الفترة المتوقع انك تكون جاهز فيها للامتحان وبتكون رينج 3 أشهر انت الى بتتحددهم وتقدر بعد كدا تحدد امتحانك فى اى يوم بالظبط داخل ال 3 أشهر دول ، وايضا هيطلب منك تحديد مكان الاختبار كمثال مصر ، واذا كنت خريج او طالب ، واخيرا دفع الرسوم وتكلفة امتحان ستب 1 او ستب 2 تقريبا 1065$ ولمزيد من التفاصيل عن تكلفة المعادلة الأمريكية كاملة من المقالة دى .

بعد ما تخلص كل الخطوات دى ويتم الدفع ، بيوصلك على الايميل حاجة اسمها Scheduling permit ودا الى بنستخدمه عشان نحجز موعد الامتحان .

بعد كدا بندخل موقع البرومترك ودا اللينك ، وبعد كدا بنختار ستب 1 أو ستب 2 او حتى 3 زى الصورة كدا

وبتقدر تحجز موعد الامتحان بالضغط على Locate زى الصورة ، هيطلب منك بعض البيانات زى مكان الامتحان مثلا مصر ، وطبعا Scheduling permit الى وصلنا على الايميل من الخطوة السابقة ، وبتقدر تعرف أقرب موعد متاح للامتحان خلال ال 3 أشهر الى كنت محددهم قبل كدا.

ملحوظة : لو اخترت موعد وقررت انك تأجل الموعد دا ، لو التأجيل دا قبل موعد امتحانك ب 30 يوم أو أكتر هيكون مجانى اما لو اقل من 30 يوم هيكون فيه رسوم اضافية ، والخطوة دى هتكون من موقع البرومتريك بردة نفس الخطوات السابقة ولكن بدلا من Locate هتختار Reschedule.

 رابعاً :Medical school verification

وهى خطوة اساسية للحصول على ال Certification فقط وليست أساسية لدخول الامتحانات ، وهى خطوة تأكيد تتم بين الكلية الخاصة بك وبين ال ECFMG وهذه الخطوة تسمى EMSWP ، وهى خطوة بسيطة جدا تكون من خلال مكتب وكيل الكلية ، وتكون بناء على طلبك ، وانك تريد تأكيد ECFMG Application الخاص بك .

وهذه الخطوة هى خطوة بديلة ل Form 183 وكانت تتم بإرسال الاوراق بالبريد وكانت تحتاج لوقت كبير.

كل خطوات التسجيل على ecfmg الى شرحناها قد تستغرق تقريبا 30 يوم.

الكورس التجريبى المجانى للمعادلة USMLE ؟

متاح لينا كورس تجريبى مجانى تقدر من خلاله تجرب سيستم الأسئلة الجديد بتاعنا والفلاش كارد دا طبعا بالاضافة للمحاضرات والكتب المجانية ، وتقدر توصل لمحتوى الكورس التجريبى من هنا وبعدها اضغط على Free Trial .

وتقدروا تعرفوا أكتر عن كورساتنا المتاحة وأهم المميزات الى بنقدمها من المقالة دى .