الماتش - USMLE Match
اتكلمنا قبل كدا عن الUSMLE وتكلفتها ووقفنا عند ستب 1 وستب 2، خلاص حضرتك نجحت الحمد لله فيهم، نكمل بقى على التقديم للنيابة والماتش، ونتكلم كمان عن ستب 3. ستب 3 مش شرط عام لازم تخلصه قبل الماتش. ولو محتاج تعرف أكتر عن المعادلة الأمريكية وخطواتها وشروطها يمكنك قراءة المقالة التالية.
ما هو الماتش؟
الماتشينج هو نظام شبيه بنظام الزمالة المصرية بتاعنا كدا. حضرتك بتقدم ملفك للبرامج على ERAS، أو منصة التقديم اللي البرنامج بيستخدمها. وبعد المقابلات، بترتب البرامج اللي عاوزها على NRMP، والبرامج كمان بترتب المتقدمين، ومن هنا بتطلع نتيجة الماتش.
ERAS لإرسال الطلبات، وNRMP لترتيب الرغبات والماتش، وليهم تسجيل ورسوم منفصلين. في ماتش 2026، الأطباء خريجو الكليات خارج أمريكا حصلوا على 9682 مكان سنة أولى، منهم 6733 لغير المواطنين الأمريكيين. دي أرقام موسم محدد، مش ضمان لفرصة أي فرد.
موعد التقديم
التقديم بيكون في سبتمبر والنتيجة في نص مارس السنة اللي بعدها. لموسم 2027، تقديم ERAS بدأ 2 سبتمبر 2026، والبرامج بدأت تشوف الطلبات 23 سبتمبر. تسجيل NRMP فتح 15 سبتمبر.
ترتيب الرغبات يفتح 1 فبراير 2027، وآخر موعد لاعتمادها 3 مارس الساعة 9 مساءً بتوقيت شرق أمريكا. يوم 15 مارس تعرف هل حصل ماتش، ويوم 19 مارس تعرف البرنامج.
عدد الرغبات و التقديم للماتش؟
يفضل تقدم في البرامج اللي فيها IMG كتير (يعني بيقبلوا خريجي كليات خارج أمريكا) ودول بيُطلق عليهم IMG Friendly، وتختار البرامج حسب ملفك وسكور Step 2 CK وشروط البرنامج، لأن Step 1 دلوقتي Pass/Fail.
عدد البرامج اللي هتقدم لها حسب ملفك والتكلفة، ومفيش رقم واحد مناسب لكل الناس. التقديم على البرامج غير قائمة الرغبات بعد المقابلات؛ قائمة NRMP حدها الأقصى 300 ترتيب، وده مش حد عدد طلبات ERAS.
بتقدم وتستنى بقا يجيلك interviews من عدد من البرامج اللي انت قدمت عليها، وبعدين ترتب مواعيدهم. المقابلة ممكن تكون أونلاين أو بحضورك حسب البرنامج، فمش كل مقابلة محتاجة سفر لأمريكا. وبعد المقابلات بترتب رغباتك الحقيقية وتستنى نتيجة الماتش في نص مارس.
الصورة الأصلية بتوضح الفكرة، لكن ترتيب التخصصات فيها من وقت كتابة المقال. قبل ما تختار، راجع بيانات البرامج الحالية وشروطها، مش الترتيب القديم لوحده.
في حاجة اسمها couples matching، ودي إنك تقدم انت وشريكك وكل واحد يسجل لوحده، وبعد كدا تربطوا الرغبات بطلب على NRMP. بتختاروا أزواج برامج تناسبكم جغرافيًا، لكنها مش ضمان إن الشخص صاحب الملف الأضعف يتقبل، ولا ضمان لنفس المستشفى أو المدينة.
تكاليف الرغبات وتكاليف التقديم للماتش
الرسوم دي لموسم ERAS 2027. خلي بالك إن الحساب لكل برنامج داخل التخصص، مش لكل تخصص كطلب واحد، ومش بتدفع كل الرسوم مرة واحدة:
عند تجهيز ملف ERAS: الـToken لخريج الكلية خارج أمريكا برسوم 185 دولار، وإرسال درجات USMLE عن طريق FSMB برسوم 70 دولار للموسم.
لما تبعت طلبات البرامج: أول 30 برنامج في نفس التخصص، كل برنامج 11 دولار. من البرنامج رقم 31، كل برنامج زيادة 30 دولار. لو قدمت لتخصص تاني، الحساب بيبدأ من الأول للتخصص دا.
يعني 30 برنامج باطنة رسومهم 330 دولار، ولو 50 برنامج باطنة رسومهم 930 دولار. دي رسوم إرسال الطلبات بس.
لما تسجل في NRMP: هتدفع 85 دولار، وده يشمل لحد 20 كود برنامج مختلف في قائمة الرغبات الأساسية. التأخير بعد 29 يناير 2027 يضيف 50 دولار.
وقت اعتماد الرغبات: كل كود برنامج زيادة عن 20 برسوم 30 دولار، والقوائم اللي فيها 100 ترتيب أو أكتر ليها رسوم طول قائمة إضافية. ولو هتشارك كـcouple، فيه 45 دولار زيادة لكل شخص.
السفر والإقامة للمقابلات الحضورية تكاليف منفصلة حسب احتياجك. راجع جدول التكاليف من أول خطوة لحد الماتش.
أهم الأسباب لزيادة فرصك فى انك تنجح فى الماتش؟
- أول وأهم حاجه طبعا هو سكورك ف step 2 ، لأن step 1 بقت pass or fail فقط ، بالتالي لازم تجيب سكور عالي ف step 2 .
- الريسيرش ، على قد ما تقدر تعمل ريسيرش إعمل ودور ع فرص كتير ، بالمناسبة كتبنا مقال عن الريسيرش تقدر تشوفه من اللينك دا .
- ال clinical experience في أمريكا او ما يعرف بال elective .
والأهم إنك تطلع من فترة ال elective ب Recommendation letters كتيره وكويسه لأنها هتعلي فرصك جدا فالقبول ف الماتش . - لو أخدت Step 3 قبل الماتش، بعض البرامج ممكن تعتبره إضافة لملفك، لكن مش شرط عام لكل المتقدمين ولا ضمان قبول. توقيته يعتمد على البرنامج وخطة التأشيرة.
ماذا بعد الماتش ؟
خلاص وصلنا لنص مارس وحضرتك ماتشت الحمد لله في برنامج من اللي رتبتهم. بتبدأ النيابة في الموعد المحدد للبرنامج، ومدة التدريب حسب التخصص؛ مثلًا الباطنة 3 سنين والجراحة العامة 5 سنين، والزمالة بعدها ليها مدة إضافية.
ماذا عن USMLE Step 3 ؟
بالنسبة لـStep 3، دا امتحان للقدرة على رعاية المريض باستقلالية، ومش قاعدة واحدة إن كل الناس لازم تمتحنه في أول سنة نيابة. كخريج من خارج أمريكا، لازم تنجح في Step 1 وStep 2 CK ويكون معاك شهادة ECFMG سارية عشان تقدم عليه، وبيتم في أمريكا فقط.
الامتحان يومين: الأول حوالي 7 ساعات والتاني حوالي 9 ساعات. ممكن اليومين يبقوا متتابعين أو منفصلين، بشرط الأول قبل التاني والفاصل مايزيدش عن 14 يوم، وفي نفس المركز.
بتختار فترة أهلية 3 شهور وتحجز اليومين مع بعض على Prometric. Step 3 مش متاح أول أسبوعين من يناير، وباقي المواعيد حسب المتاح في المركز. عدد المحاولات الأقصى للـStep الواحد دلوقتي 4 محاولات إجمالًا، مش 6.
تقسيم Step 3 الحالي بعد تحديث 2026:
اليوم الأول: 232 سؤال اختيار من متعدد، على 12 بلوك، كل بلوك من 18 لـ20 سؤال ومدته 30 دقيقة.
اليوم التاني: 180 سؤال، على 9 بلوكات، كل بلوك 20 سؤال ومدته 30 دقيقة، وبعدهم من 13 لـ14 حالة CCS، زمن الحالة 10 أو 20 دقيقة.
اليوم الأول فيه 55 دقيقة راحة، والتاني 45 دقيقة على الأقل. راجع التدريب الرسمي على شكل الامتحان قبل موعدك عشان تتعود على البلوكات والحالات.
الكورس التجريبى المجانى ؟
بنفكركوا ان متاح لينا كورس تجريبى مجانى بعد التحديث الجديد وتقدر من خلاله تجرب سيستم الأسئلة الجديد بتاعنا والفلاش كارد دا طبعا بالاضافة للمحاضرات والكتب المجانية ، وتقدر توصل لمحتوى الكورس التجريبى من هنا وبعدها اضغط على Free Trial .
وتقدروا تعرفوا أكتر عن كورساتنا المتاحة وأهم المميزات الى بنقدمها من المقالة دى .
المزيد من المقالات