الماتش – USMLE Match

اتكلمنا قبل كدا عن الUSMLE وتكلفتها ووقفنا عند ستب 1 وستب 2 ، خلاص حضرتك نجحت الحمد لله فيهم ، يتبقالك خطوتين كمان ( الماتش و ستب 3 ) ومقال النهاردة هيكون عنهم ، ولو محتاج تعرف أكتر عن المعادلة الأمريكية وخطواتها وشروطها يمكنك قراءة المقالة التالية .

ما هو الماتش؟

الماتشينج هو نظام شبيه بنظام الزمالة المصرية بتاعنا كدا ، حضرتك بتقدم على موقع ERAS وترتب الرغبات فى التخصصات اللي انت عاوزها وبتتنافس مع 14000 طالب أجنبي تاني معظمهم هنود ومن امريكا الجنوبية ، و23000 الف طالب من طلبة أمريكا ، بينجح من الطلبه الأجانب حوالي 7000 بس .

موعد التقديم:

التقديم بيكون ف سبتمبر والنتيجة فى نص مارس السنه اللي بعدها .

عدد الرغبات و التقديم للماتش؟

الافضل إن الرغبات ميقلوش عن 50 رغبة ، إنت أصلا ليك maximum 300 ، ويفضل تقدم ف البرامج اللي فيها IMG كتير ( يعني بيقبلوا طلبة أجانب كتير ) ودول بيُطلق عليهم IMG Friendly ، هنضيفلك صورة فيها اكتر البرامج ال IMG Friendly بالترتيب ، ويفضل تقدم برضو ع تخصصات قريبه من سكورك ف step 1 , 2 .

بتقدم وتستنى بقا يجيلك interviews من عدد من البرامج اللي انت قدمت عليها ، وبعدين ترتب مواعيدهم وتسافر ليهم وترجع تستنى بقا نتيجة الماتش ف نص مارس .

في حاجه اسمها couple matching ، ودي إنك تقدم انت وزوجتك وبعد كدا تبعت ال couple request ، دا بيعلي فرص الشخص اللي ال CV بتاعه مش قوى اوى وبيخليكم تماتشوا ف نفس المكان سوا .

تكاليف الرغبات وتكاليف التقديم للماتش:

اول ١٠ تخصصات هتختارهم ، التخصص الواحد ب ٩٩ دولار .
من ١١ ل ٢٠ ، التخصص ب ١٥ دولار
أما من ٢١ ل ٣٠ ، التخصص ب ١٩ دولار
و بعد ال ٣٠ تخصص فما فوق كل رغبه ب ٢٦ دولار
+ تكاليف قعدتك وتنقلاتك ف أمريكا عشان ال interviews .

أهم الأسباب لزيادة فرصك فى انك تنجح فى الماتش؟

1. أول وأهم حاجه طبعا هو سكورك ف step 2 ، لأن step 1 بقت pass or fail فقط ، بالتالي لازم تجيب سكور عالي ف step 2 .
2. الريسيرش ، على قد ما تقدر تعمل ريسيرش إعمل ودور ع فرص كتير ، بالمناسبة كتبنا مقال عن الريسيرش تقدر تشوفه من اللينك دا .
3. ال clinical experience في أمريكا او ما يعرف بال elective .
   والأهم إنك تطلع من فترة ال elective ب Recommendation letters كتيره وكويسه لأنها هتعلي فرصك جدا فالقبول ف الماتش .
4. طبعا لو أخدت step 3 قبل الماتش دا بيعلي فرصك برضة .

ماذا بعد الماتش ؟

خلاص وصلنا لنص مارس وحضرتك ماتشت الحمد لله فى تخصص من التخصصات اللي قدمت فيها رغبات ، بتقضي بقا فترة نيابة من ٣ ل ٨ سنين ع حسب التخصص بتاعك .

ماذا عن USMLE Step 3 ؟

بالنسبه ل step 3 فانت هيكون مطالب منك ان تمتحنها فى اول سنه ليك ف النيابه هناك ، و دا امتحان بيختبر كل حاجه ، بس التركيز بيكون اكتر علي النسا و الباطنه و الرعايه الطبيه و الاطفال ، و بيكون عباره عن يومين متتابعين ، كل يوم امتحان مدته ٧ ل ٩ ساعات .

الامتحان بيبقي في اي يوم من ايام السنة ماعدا اول اسبوعين في يناير ( عشان اعياد الميلاد ) و يوم 4/7 عشان العيد بتاعهم وانت بتحدد معاهم 3 شهور ورا بعض من السنة لازم تخش الامتحان في يوم منهم ، ولو سقطت ليك تعيد الامتحان 6 مرات .

الامتحان عبارة عن 7 بلوكات كل بلوك فيه ما لايزيد على 40 سؤال وزمن كل بلوك ساعة واحده بس يعني المجموع 280 سؤال تقريبا مدتهم 7 ساعات و ليك ساعه راحة ممكن تقسمها زي ما انت عاوز بين البلوكات وبعضها . وطبعا بيختبروا برضو قوة التحمل والتركيز اكتر من المعلومات نفسها ، والامتحان عبارة عن اسئلة MCQ Clinical Cases .

الكورس التجريبى المجانى ؟

بنفكركوا ان متاح لينا كورس تجريبى مجانى بعد التحديث الجديد وتقدر من خلاله تجرب سيستم الأسئلة الجديد بتاعنا والفلاش كارد دا طبعا بالاضافة للمحاضرات والكتب المجانية ، وتقدر توصل لمحتوى الكورس التجريبى من هنا وبعدها اضغط على Free Trial .

وتقدروا تعرفوا أكتر عن كورساتنا المتاحة وأهم المميزات الى بنقدمها من المقالة دى .